REAGIM
Ngjarja shqetësuese në Komunën e Klinës, respektivisht në SHFMU ‘’Atë Shtjefën Gjeçovi’’ në fshatin Zllakuqan, ka tronditur masën e gjerë kudo. Pas raportimeve të mediave, theksohet se një grup fëmijësh prej 7 personave kanë realizuar një video sipas të cilës denigrohet figura e njërit prej nxënësve të shkollës në fjalë. Në video shihen qartazi disa veprime seksuale para nxënësit, i cili mbahet me dhunë dhe inçizohet gjithçka për t’u publikuar më pas. Video-inçizimi publikohet edhe në rrjete sociale, prej ku edhe masa e gjerë e sheh dhe njofton policinë për rastin.
Rasti nga drejtoresha e shkollës, Besarta Nrecaj, cilësohet si një rast i rëndë dhe nga momenti që mori infomatat (sipas saj) ndërmori masat për të zbardhur rastin, prej ku edhe njofton këshillin e shkollës, këshillin e prindërve, psikologun dhe pedagogun. Nxënësit e përfshirë në këtë rast, u larguan për disa ditë për t’u rikthyer më pas sërish në shkollë, ndërsa viktima u cilësua si fëmijë ‘’jo i sjellshëm’’ dhe u largua nga shkolla. Viktima megjithëse ishte sulmuar, nga frika e bullizimit nga sulmuesit, nuk e kishte treguar rastin. Në anën tjetër drejtori i DKA-së në Klinë, nuk e cilëson këtë ngjarje shqetësuese, përkundrazi, ai e quan si një ‘humor që ndeshet me rregulloret e shkollave’. Ndërsa, qytetarët e cilësojnë si një rast tragjik, prej ku duhet të ndërmirren masat e menjëhershme.
Ky rast është përcjellur si dhunë seksuale, sulm fizik dhe denigrim publik. Ndërsa nga ana e rendit shihet një menaxhim jo i efektshëm, sjellje jo profesionale dhe trajtim johuman i fëmijës.
Dhuna ndaj fëmijëve është bërë një realitet shqetësues për të gjithë shoqërinë kosovare, duke u shprehur në forma fizike, psikologjike dhe emocionale. Dhuna e fëmijëve ndaj njëri-tjetrit shprehet në mosha të ndryshme. Pasojat negative që vijnë nga dhuna dhe keqmenaxhimi i organeve përgjegjëse janë afatgjate dhe të vazhdueshme.
Ne si ‘’Rrjeti i Prindërve Edukues të Kosovës’’ dënojmë këto akte dhune, përfshirjen e fëmijëve në to dhe duam të theksojmë se këto dukuri negative janë të papranueshme dhe përgjegjësit duhet të marrin denimin e merituar. Detyra jonë si individë është të përballemi me këto sfidë dhe t’ua sigurojmë fëmijëve tanë një mjedis të sigurt dhe asesi t’i trajtojmë këto raste si raste normale.
Dhuna mes fëmijëve është një problem i dyfishtë. Viktimat e prekura të dhunës kërkojnë mbrojtje nga dhuna e brendshme në familje dhe në shoqëri. Edukimi i mirëfillt për vlerat e respektit dhe bashkëjetesës, ngritja e vetëdijës dhe zërit për parandalimin e dhunës, trajtimin adekuat të fëmijëve dhe personave pa dallim dhe sidomos përkrahjen e rasteve më të ndjeshme të shoqërisë, sensibilizimin i masës për shkaktarët dhe ofrimin i zgjidhjeve afatgjata janë disa nga hapat themelorë për ndërprerjen e këtij problemi. Institucionet përgjegjëse, duke filluar nga DKA-ja, duhet sa më parë të marrin timon drejtues, të kuptojnë përgjegjësitë e tyre, të jenë të efektshëm dhe të përmbushin rolin e tyre në sensibilizimin e opinionit publik, të trajtimit të rasteve të dhunës seksuale me seriozitet, të kuptojmë faktorët socialë, ekonomik dhe problemet psikologjike të sjelljeve destruktive tek fëmijët dhe të rriturit, të jepen trajtime për traumat dhe zhvillimin emocional, marrjen e masave konkrete për të siguruar mbrojtje dhe mirëqënie për të prekurit.
Sistemi ynë i brishtë arsimor, mungesa e profesionalizmit dhe neglizhenca në përgjithshmëri, në vazhdim mund të sjellë edhe raste të tjera, prandaj çdo shkelje etike e profesionale dhe çdo dhunë, duhet dënuar dhe zgjidhur rastet sa më parë. Kërkojmë nga Prokuroria e Shtetit, Inspektoriati Arsimor, Ministria e Arsimit, DKA-ja dhe çdo institucion tjetër përkatës, që rastet e dhunës t’i hetojnë detajisht dhe t’i përgjegjësit të hedhin para drejtësisë. Një shoqëri e drejtë dhe e zhvilluar i respekton të drejtat dhe integritetin e fëmijëve pa dallime, bën thirrje për ndryshime, përkahë familjen si insitucion thelbësor për shoqërinë, merr veprime konkrete për të siguruar një të ardhme më të ndritshme për brezat e ardhshëm dhe angazhohet drejt krijimit të një mjedisi të sigurt për brezat e ardhshëm.
Prishtinë, 4 Prill 2024
Rrjeti i Prindërve Edukues të Kosovës
