Procedurat për mbajtjen e higjienës orale në kushte shtëpie ndryshojnë gjatë fazave të ndryshme të fëmijërisë. Secila fazë ka specifikat e veta të lidhura me moshën.
Përmbushja e rolit të prindit në mbajtjen e higjienës orale në pothuajse çdo kategori moshe është e rëndësishme. Roli i prindit mund të jetë si udhëzues, demonstrues, motivues, apo mbikëqyrës.
Këshillat para lindjes së fëmijës
Koha më e mirë për të filluar këshillimin e prindërve dhe për të nisur programin parandalues dentar është para lindjes së fëmijës. Për një çift në pritje, veçanërisht për fëmijën e tyre të parë, kjo është një kohë kur ata janë më të hapur ndaj rekomandimeve që lidhen me kujdesin dentar dhe shëndetin në përgjithësi.
Prindërit zotërojnë instinktin e fortë për të ofruar më të mirën për fëmijën e tyre. Këshillimi i tyre për zakonet higjienike dhe modeli që ata ofrojnë si prindër do t’ju ndihmojë të promovoni shëndetin oral, si për veten ashtu edhe për fëmijën.
Këshillimi i nënës shtatzënë gjithashtu luan një rol të rëndësishëm. Duke shpërfillur disa nga mitet që ekzistojnë për këtë periudhë, ajo duhet të kujdeset për të siguruar sasitë e nevojshme të ushqimeve të shëndetshme për veten dhe për beben, duke u kujdesur për shëndetin e përgjithshëm të bebes si dhe për shëndetin e dhëmbëve, në veçanti.
Periudha e foshnjeve deri në 1 vjeç
Disa procedura themelore të higjienës orale mund të nisen gjatë vitit të parë të jetës së fëmijës.
Pastrimi i pllakut dental duhet të fillojë kur dalin dhëmbët e parë të qumështit. Në këtë fazë, prindi është përgjegjës për pastrimin e dhëmbëve të fëmijës.
Kjo mund të bëhet me ndihmën e garzave(tamponëve sterile), me anë të së cilave pastrohen lehtësisht sipërfaqet e dhëmbëve dhe duke masazhuar mishrat e dhëmbëve. Kjo teknikë rekomandohet të aplikohet një herë në ditë. Fëmija duhet të mbahet në krahë dhe të përkëdhelet ose të shpërqendrohet ndërsa teknika e pastrimit realizohet lehtësisht.
Përveç garzave, mund të përdoren edhe brusha të vogla me fije të buta, por kjo mbetet në preferencën e prindërve.
Nuk rekomandohet përdorimi i pastave pasi pasta ka veprim shkumues dhe nuk është i përshtatshëm për fëmijën e kësaj moshe. Po ashtu, ekziston mundësia e gëlltitjes së pastës nga kjo moshë dhe në këtë mënyrë do të merrej sasi e konsiderueshme e fluorit.
Në këtë fazë të jetës, është e rëndësishme që fëmija të realizojë vizitën e parë te dentisti. Preferohet që kontakti i parë i fëmijës me dentistin dhe ambientin e punës të ndodhë kur fëmija ka dhëmbë të shëndetshëm dhe nuk ka ndonjë ankesë që kërkon trajtim.
Në rast se ndodh e kundërta, dhe fëmija ka ndonjë ankesë si dhimbje apo lëndim, vizita do të jetë më traumatike për fëmijën. Ndihma e ofruar për të zgjidhur problemet mund të perceptohet nga fëmija si më shumë stres sesa ndihmë.
Prandaj, një vizitë e hershme, kur fëmija është i shëndetshëm dhe nuk ka ankesa, supozohet të lehtësojë kontrollet e ardhshme, duke bërë fëmijën më të qetë dhe më të përshtatur me ambientin, dhe duke e bërë vizitën më pak stresuese për fëmijën, prindin dhe dentistin.
Autore: Dr. Marigona Gashi, Prinderimi.com
